Со цел остварување на заедничките заложби за зајакнување на меѓусебната соработка во насока на поддршка во напорите за воспоставување на инклузивен процес на дигитализација кој ќе донесе придобивки за секој граѓанин, а во насока на поддршка на активностите за дигитална општествена трансформација, Министерството за информатичко општество и администрација (МИОА) и Институтот за добро управување и евроатлантски перспективи (ИДУЕП) склучија Меморандум за соработка.
Двете страни ставаат фокус во остварување на следните активности:
- Поддршка за промоција на активности поврзани со дигитализацијата и одржливата дигитална трансформација на општеството со фокус на придобивките кои произлегуваат за граѓаните, организациите и компаниите од таквиот процес:
- Воспоставување на поширока платформа на организации и други општествени чинители во процесот на креирање на одржлива дигитална трансформација на општеството, како и информирање на Министерството за преземените чекори и резултати во сферата на дигитализацијата, кои го подобруваат квалитетот на живот на секој човек;
- Ставање на располагање на човечките и други капацитети на ИДУЕП во насока на давање на придонес кон МИОА како јавна институција за поддршка во: скрининг и процесот на преговори за членство во ЕУ, а во рамки на поглавјето 10 „Информатичко општество и медиуми“;
- Вклучување во работни групи на МИОА и други работни тела на Владата координирани од Министерството, а со цел поголема инклузивност, компетентност и транспарентност;
- Организирање на пошироки јавни настани со цел подигање на свеста од придобивките за граѓаните од дигиталната трансформација на општество;
- Планирање на пошироки заеднички активности со цел градење општествена отпорност преку справување со дезинформациите и теориите на заговор поврзани со дигитализацијата кои имаат намера да ги поткопаат демократските придобивки и човековата слобода и права;
- Други заеднички активности од овој домен, особено вклучување на младите во процесите на носење одлуки, како и обезбедување младинска поширока вклученост во националните активности поврзани со дигиталната трансформација на општеството.
Меморандумот е дел од напорите на ИДУЕП Институтот кои имаат за цел дигитализацијата на македонското општество конечно да стане национален и натпартиски приоритет кој ќе ги обединува различните општествени чинители, наместо да двои и поларизира. Имено, дигиталната трансформација продолжува да биде висок приоритет во работата на ИДУЕП, особено во првиот столб во работата на Институтот кој е посветен на областа на добро управување. Иницијативата започна за време на заедничка средба со министерот за информатичко општество и администрација, Азир Алиу во текот на март 2023 година. Потребата за натпартиска и национална платформа поврзана со процесот на дигитална трансформација ИДУЕП ја заговара и активно работи повеќе од 3 години бидејќи сметаме дека дигитализацијата како процес е клучен во сите сфери, особено ако сакаме напредок за граѓаните, воведување на принципите на компетентност, со акцент и на ефикасна и неселективна борба со партизацијата и корупцијата во земјава.
Потпишаниот Меморандум за соработка помеѓу ИДУЕП и МИОА ги адресира овие теми и претставува темел за одржлива и долгорочна меѓусебна соработка на овој план. Очекуваме ова да биде директниот канал каде ИДУЕП ќе ги пласира своите предлози, иницијативи и идеи за одржлива и брза дигитализација на општеството од интерес на секој човек, како и местото каде дополнително ќе се даде поддршка на европскиот пат на земјата, особено во рамките на преговорите за членство во ЕУ, во делот на Поглавје 10 – Информатичко општество и медиуми.
