Секретаријатот за европски прашања (СЕП) отпочна процес на консултации со граѓанското општество за изготвување на патоказите за владеење на правото, функционирањето на демократските институции и реформа на јавната администрација кои треба да се подготват согласно Преговарачката рамка усвоена од Советот на ЕУ на 18 јули 2022 година, а на кои беа поканети и активно учество зедоа претставници на Институтот за добро управување и евроатлантски перспективи (ИДУЕП).
Состанокот беше одржан во просториите на Секретаријатот на 24.8.2023 година, а на него учествуваа и вицепремиерот за европски прашања, Бојан Маричиќ, која подетално ги информираше и ги објасни чекорите кои треба да се преземат следниот период, а државните советници, Драган Тилев и Селвет Барути, и раководителката на Секторот интеграции, Христина Конеска-Бероска, ја презентираа структурата која Патоказите која да ја следат и формата во која се очекува придонесот од граѓанските организации, во оваа фаза од подготовката на овие документи.
Вицепремиерот изрази благодарност до претставничките и претставниците на граѓанскиот сектор за посветеноста и желбата процесот да успее и да помогнат, додавајќи дека „невладините организации остануваат силен партнер во евроинтегративниот процес и како едни од клучните актери во процесот на демократизација на македонското општество остануваат активни до крај на исполнување на стратешката цел на државата, а тоа е членството во ЕУ“.
Претставниците на ИДУЕП ја поздравија првата од серијата на консултативни средби, како и вклучувањето на граѓанскиот сектор во процесот на европска интеграција и преговори за членство во ЕУ. Тие дадоа предлог поголем фокус во процесот да се стави во комуникацијата на овие теми во јавноста од страна на надлежните институции, но и од граѓанските организации и носителите на локалната власт и пратениците од надлежните комисии во македонското Собрание. Дополнително, ИДУЕП информираше дека целосно на располагање го става својот капацитет, знаења и ресурси бидејќи како граѓанска организација од своето формирање во 2009 година активно работи на промоција на придобивките за граѓаните и потребата од полноправно членство во евроатлантските институции.
За време на консултативната средба, од Секретаријатот за европски прашања најавија дека средбите со граѓанските организации ќе продолжат и во фазите кои ќе следат, а со цел на крајот да се обезбедат патокази кои ќе бидат одраз на напорите на сите општествени чинители за реформи на политиките и институциите и за подготовка за полноправно членство во ЕУ до 2030 година.
