Во заедничка организација на Комисијата за спречување и заштита од дискриминација (КСЗД) и Институтот за добро управување и евроатлантски перспективи (ИДУЕП), а под покровителство на претседателот Стево Пендаровски на ден 22 септември 2022 година се одржа јавна дискусија на тема ,,Дискриминирачки говор на дигитални медиуми – состојба и предизвици”.
Настанот имаше за цел собирање и обединување на едно место на иницијално заинтересирани општествени чинители и актери, а со цел создавање на иницијална Национална платформа и нејзин план на активности за справување со дискриминирачкиот говор и другите негативни појави во интернет просторот. На настанот присуствуваа повеќе од 40 луѓе, меѓу кои и претставници од повеќе од 25 релевантни граѓански организации кои активно работат во сфери непосредно поврзани со потребата од справување со дискриминирачкиот говор и говорот на омраза на интернет.
„Спречувањето на дискриминирачките содржини во интернет просторот, како и во јавниот говор, мора да стане национален приоритет. Превенцијата е клучна. Клучно е сите оние кои се кријат зад удобноста на тастатурата да бидат свесни дека се одговорни за напишаното или кажаното. Дискриминацијата не препознава етничка или религиска припадност, пол, род или сексуална ориентација. Напротив, дискриминацијата еднакво боли и ја повредува секоја личност, го подрива нејзиниот интегритет и самодоверба и остава трајни последици врз човекот, неговите најблиски, но и врз општеството во целина. Благодарност до Комисија за спречување и заштита од дискриминација и ИДУЕП да бидам дел од иницијативата чијашто цел е да го деконтаминира дигиталниот простор од дискриминирачката реторика. Верувам дека со заеднички напори на сите релевантни чинители и обединување на искуствата можеме да придонесеме во оваа значајна борба“, истакна претседателот Пендаровски во своето обраќање.
Иницијативата за овој прв настан потекна од потпишаниот Меморандум за соработка помеѓу Комисијата за спречување и заштита од дискриминација и Институтот за добро управување и евроатлантски перспективи каде, меѓу другото, е предвидено обезбедување на поддршка на работата на КСЗД, како и креирање на поширока платформа на организации и други општествени чинители во процесот на изнаоѓање на успешни решенија, пракси, односно автентичен национален модел за ефикасно справување со дискриминирачкиот говор и другите негативни појави на интернет.
